رصدت منصة المخبر الإلكترونية الإخبارية من صالة دينار الملكية كلمة نائب رئيس مجلس السيادة السوداني الفريق اول محمد حمدان دقلو حميدتي في إفطار منظمة شباب البناء والتعمير،
فيما يلي نص الكلمة مع البث المباشر على صفحة صحيفة المخبر الإلكترونية بالفيس بوك لكل الفعالية.
كلمة حميدتي
بسم الله الرحمن الرحيم
والصلاة والسلام على رسول الله صلى الله عليه وسلم
نترحم على الشهداء مدنيين وعسكريين، وعاجل الشفاء للجرحى، ونحن حاجة واحدة كعسكريين ومدنيين وكلنا أبناء وطن واحد، ودي السياسة عايزين يفرقوا بيننا، عشان يلقوا ليهم موطئ قدم لازم يفرقوا بين العسكريين والمدنيين
ان شاءالله حتستمر اللقاءات معكم ونحن ماشين في الاتجاه الصحيح، ماكنت قايل تتملئ الصالة بكل المدنيين ديل
نحن بنعتذر لكل زول بتقطع منه الموية والكهرباء ونحن معاكم ومع الغلابة ولكن ما نتحمل المسؤوليات برانا، عايزين نقسم المسؤوليات
مشكلة المويه من ٢٠١٥ ولحدي ٢٠١٩ العجز في الخرطوم كان ٩٠٠ الف متر مكعب من المياه، والناس بتتكلم عن قطوعات المويه والكهرباء في الخرطوم بس وناسين الولايات، عشان الخرطوم فيها المظاهرات وإغلاق الشوارع
وكمان شايف الناس السابقين طلعوا ونعنشوا شديد، ما مفترض يكون هنالك عجز بعد الثورة
العجز في الموية حاليا في الخرطوم مليون و٢٠٠ الف متر مكعب من المياه
ياداب الطين زاد بله، ما مفترض يكون هنالك عجز بعد الدعم الوجدته الثورة
انا ذاتي الموية قاطعة في بيتي ليها يومين، وجاءت اليوم
انا في المجلس السيادي مافي يدي اي حاجة بتلقى ١٠٠ متاريس زي متاريس الشوارع، البلد دي اعدائها كثر
انتم الشباب لازم تكربوا قاشكم، البلد دي عايزه صدق واخلاص، تلت ارباع الموية ملوثة ودي مشكلة كبيرة كمان وتحتاج لعلاج
التغيير الذي تم في ٢٥ اكتوبر بما فينا حمدوك كنا متفقين ومعانا الموقعين على اتفاق السلام وود الفكي والتعايشي كانوا بينتقدو الوضع من داخل مجلس السيادة
والناس يتكلموا عن الوفاق، سنتين ونصف منتظرين الولاة، ونحن كنا بنأكد لازم يكون هنالك اتفاق وحمدوك كان يرى بانه لابد من الوفاق
يوم ٢١ نوفمبر حمدوك رجع وكلهم متفقين معانا على الكلام ده ما عدا الحزب الشيوعي ورجع حمدوك يشكل حكومة ومافي وفاق، حمدوك رجع والعنف في ومافي وفاق وحمدوك ماكان موافق على ٢٥ اكتوبر
نحن بنعرف الجماهير وبنعرف الشعب، القاعة دي مليانة مدنيين وكمان بالخارج، ونحن ما رافضين الوفاق والدليل بأننا لم نأتي برئيس وزراء، نحن من أنصار الوفاق البلد دي ما بتمشي الا بالاانتخابات وما عايزين نخشها مختلفين عايزين نخشها ونحن متفقين لو عايزين نعمل ديمقراطية حقيقية
الثورة ما انتهت الناس أصابها الاحباط نحن انحزنا للثورة والعافية درجات، ماثورة الابتزاز وحكم قرقوش، نريد ثورة العدالة والقانون والمساواة بين الناس
نحن عايزين من الشباب يراقبوا الدكاكين والدولار، الدولار ارتفع إلى ٨٠٠ جنيه وكانوا متوقعين يصل الف واكتر من كده، الدولار نزل ودايرنو ينزل اكتر من كده، جاتنا رسائل وكلها محتفظين بيها وحنطلعها ليهم، كل الوطنيين شغالين عشان الدولار يدق الواطة، والان شغالين في المحاكم والنيابة عشان تاني الدولار كان لقيتو في النقعة تجري منو
ونحن شغالين في موضوع ٩ طويلة وعايزين الشباب في الأحياء يساعدوا القوات النظامية الأمن مسؤولية الجميع
https://fb.watch/cpwd9qUeFX/